" Hau pronto atu simu naran saida deit mak ema fo ba hau" (Ditador)

Fretilin: KONFERENSIA IMPRENSIA

Liu husi Konferensia Imprensa ida nee Partido FRETILIN hakarak hatoo nia apelo no posisaun ba povo maubere tomak hafoin deklarasaun nebe mak Primeiro Ministro de Faktu hatoo hanesan tuir mai;

" Hau pronto atu simu naran saida deit mak ema fo ba hau (Ditador), bainhira Marcha de Paz lao, akontese buat ruma hau sekaer ema balun no hau husu ba ema hotu atu labele husik sira nia uma".

Deklarasaun Primeiro Ministro Defaktu nian, Partido FRETILIN konsidera hanesan deklarasaun ida atu ameasa no hatauk povo maubere.

.

Nunee Partido FRETILIN hakarak halo apelo ba Povo Maubere ho lia fuan hanesan tuir mai:

1. Husu ba Povo Maubere tomak liu-liu militantes no simpatizantes FRETILIN atu labele hakfodak no tauk ho deklarasaun Primeiro Ministro de Faktu nian- tan FRETILIN latauk ema so respeito deit ba konstituisaun no lei nebe vigora . FRETILIN fiar katak direito atu organija marcha de paz no kualker manifestasaun konsagra iha Konstituisaun RDTL.

2. Partido FRETILIN hakarak reafirma katak Marcha de Paz nebe mak Committee Central FRETILIN nian hakatu tiha ona se realiza nafatin no se informa ba publiku tomak inklui autoridades seguransa PNTL nian.

3. Partido FRETILIN se organija didiak Marcha de Paz nee tuir lei nebe aplika iha Timor-Leste no sei la uza violensia hanesan sira balun uja iha tempo krize 2006 liu ba.

4. Partido FRETILIN sei serbisu hamutuk ho Forsa Seguransa PNTL atu bele fo seguransa ba lalaok Marcha de Paz nian.

Ikus liu Partido FRETILIN hatoo nia posisaun kona ba Deklarasaun Primeiro Ministro de Faktu nian hanesan tuir mai:

1. Partido FRETILIN la rekuinese guverno ida nee no haklaken tiha ona katak guverno ida nee guverno de faktu.

2. Partido FRETILIN se la fiar katak Primeiro Ministro de Faktu bele fo ordem atu kaer ema balun tan se mak iha knar atu fo ordem kaer mak Tribunal no Juizes sira

3. Partido FRETILIN lahakfodak se Primeiro Ministro de Faktu hakarak sai ditador- tan esperiensa iha mundu tomak hatudu katak ditador sira mos se monu no se responsabilija hahalok nebe mak sira halo durante sira nia ukun.

4. Partido FRETILIN hakarak deklara katak ordem nebe mak Primeiro Ministro de Faktu sei fo kona ba atu kaer ema balun-latuir lei nebe mak vigora iha Timor Leste, nia konsikuensia ba nia an rasik no ba sira nebe mak implementa ordem NEE sei mosu iha loron ikus, tan sira viola direitos humanus, Konstituisaun RDTL no leis nebe vigora iha Timor-Leste.

Ho deklarasaun ida ami hatoo obrigado wain

Arsenio Bano, Vice Presidente - Jose Manuel Fernandes, Adjucto Secretario Geral - Aniceto Guterres, Chefe Bankada FRETILIN

.